Blog

CGT no FONGTIL husu labele enfrakeza Lei Fundu Petroliferu

Komunikadu Imprensa konjunta

IMG_7676
CGTfotokomunikaduFOngtil

Lei Fundu Petrolíferu Artigu 26(g) hili sosiedade sivíl nudár parte ida hosi Konsellu Konsultativu Fundu Petrolíferu atu bele fó asesoria bainhira Governu introduz lejizlasaun sira kona-ba dotasaun hosi Fundu Petrolíferu. Nune’e, ho komunikadu ida ne’e, nudár parte ida hosi preokupasaun sosiedade sivíl nian ba Lejislatura dalima nian ne’ebé kria hela ezbosu revizaun ba Lei Orsamentu no Jestaun Finanseiru no mós LeiFundu Petrolíferu atu bele fasilita levantamentu osan Fundu atu finansia estadu.

 

Maske, ami konkorda katak Governu presiza hela osan tanba dezde iha tinan kotuk laiha Orsamentu Rektifikativu no mós orsamentu jerál estadu 2018, maibé dalan ida atu foti   osan ne’e la presiza enfrakeza prinsipiu di’ak sira hosi Lei Fundu Petrolíferu rasik, basa, Fundu ne’e rasik tenke jere ho polítika ne’ebé di’ak ba benefísiu jerasaun ohin no futuru nian, no nudár instrumentu ida ne’ebé bele kontribui ba polítika fiskál ida ne’ebé di’ak, inklui nia levantamentu mós tenke tetu tiha interese tempu naruk povu Timor-Leste nian.

 

Ami tetu ona ho kle’an katak planu revizaun ba lei rua importante ida ne’e nudár forma enfrakesimentu jestaun di’ak reseita petrolíferu ne’ebé durante ne’e sai tiha orguilozu povu Timor-Leste nian. Revizaun ida ne’e sei kria presedente ida ne’ebé ladi’ak ne’ebé hafasil liu tan gasta riku soin povu nian lahó responsabilidade no sei afeta ba jerasaun ohin no mós aban bainrua nian. Tanba ne’e, ami sujere atu:

 

Timor-Leste presiza mantén nia regra di’ak sira ne’ebé promove boa governasaun no transparénsia orsamentál no mós reseita petrolíferu nian. Nune’e, atu antisipa situasaun polítika ohin loron nian ne’ebé antes ne’e la antisipa iha Lei Orsamentu no Jestaun Finanseiru no mós Lei Fundu Petrolíferu rasik, Parlamentu bele halo de’it revizaun simples ida ne’ebé mensiona montante espesífiku ba iha tinan 2018 ne’e de’it, ne’ebé nia montante labele liu projesaun RSE ba 2018 ho tokon $475.1 ne’ebé kalkula ona iha Orsamentu Jerál Estadu 2017. Levantamentu ida ne’e mós tenke konsidera levantamentu sira ne’ebé halo tiha ona iha fulan Maiu hosi Governu da hitu nian. Karik Parlamentu hakarak atu halo mudansa boot iha Lei Orsamentu no Jestaun Finanseiru inklui Lei Fundu Petrolíferu Revizaun, Parlamentu bele konsidera ida ne’e iha nia mandatu tinan lima oin mai nia laran.

  • Prosesu Orsamentu tenke nafatin tuir mekanizmu duodecimo nian to iha Orsamentu Jerál Estadu 2018 aprovadu no Promulgadu. Nune’e mós, levantamentu Fundu Petrolíferu nian mós tenke tuir prinsipiu duodecimo nian katak tokon $475.1 X 1:12 = tokon $39.6 ne’ebé sura kedas hosi Janeiru 2018.
  • Governu da Walu ida ne’e bele prosesa lalais nia Orsamentu Jerál Estadu 2018 ho normal tanba iha apoiu forsa maioria Parlamentár. Situasaun ne’e la akontese ba Governu da hitu ne’ebé la hetan apoiu maioria Parlamentár. No bainhira levantamentu Fundu nian iha mandatu Governu da hitu nian ida ne’e akontese, PN dissolvidu hela. Maske nune’e, ami preokupa ho menus konsulta hosi Governu iha tempu ne’ebá ho entidade sira, espesialmente sosiedade sivíl.
  • Ami enkoraja atu Parlamentu Nasional bele halo audiénsia públiku ida ne’ebé kle’an liu ho entidade sira hotu hanesan sosiedade sivíl, academia, partidu polítiku sira, Konsellu Konsultivu Fundu Petrolíferu no mós públiku sira seluk kona-ba planu revizaun lei fundamental rua ne’e.
  • Situasaun ida ne’e fó lembra fila fali ba ita katak Timor-Leste presiza duni diversifikasaun ekonomia, nudár dalan ida atu bele hametin liu tan ekonomia rai laran.
  • Atu taka, ami hakarak tau énfaze katak ami fiar, membru Parlamentu sira sei tau tiha interese povu nian as liu fali sira nia interese partidu no podér ukun nian, atu lori moris di’ak ba povu Timor-Leste.

 

Dili 11 Jullu 2018

Deklarasaun Konjunta

 

Diretór Executivu Fongtil,             Rep. Koordenadór CGT,         Reprezentante sosiedade sivíl ba KKFP

Daniel Santos  do Carmo               Sabino Fitun                                    Juvinal Dias

 

CGT husu Governantes nebe mos hosi korrupsaun

CGTkomunikaduimprensa

‘Husu ba Sua Exelénsia Prezidente da Repúblika RDTL, atu la hili kandidatu membru VIII Governu sira ne’ebé inkapasidade, problematiku, nune’e sira labele repete erru sira iha tinan 10 kotuk liu ba nian’ Portavoz CGT-TL

Juvinal Dias

 

Antesedente

Iha  12 Maiu 2018, povu Timor-Leste ejerse ona sira nia direitu hodi hili partidu polítiku no koligasaun sira iha eleisaun antisipada. Eleisaun ida ne’e akontese hafoin Prezidente Repúblika DR. Francisco Guterres Lu Olo dissolve tiha Parlamentu Nasional iha fin de Janeiru hafoin Timor-Leste enfrenta impasse polítika tanba Partidu sira ne’ebé iha Parlamentu Nasional la intende malu hodi halo Timor-Leste labele iha Orsamentu Jerál Estadu durante fulan neen nia laran hafoin Governu dahitu ne’ebé lidera hosi Fretilin ho PD tama ba kaer ukun.

Iha Partidu/Koligasaun walu mak sai tiha kontestan ba eleisaun ida ne’e. CNRT, PLP no Khunto harii koligasaun ida ho naran Aliansa Mudansa ba Progresu (AMP) mak sai tiha partidu vencedor iha eleisaun ida ne’e ho kadeira 34 kompara ho Fretilin ho kadeira 23, PD kadeira 5 no koligasaun FDD ho kadeira 3.

 

Formasaun Governu Konstitusional VIII

Depois rezultadu eleisaun ne’e publika tiha hosi Tribunal Rekursu, AMP nudár vencidor hahú ona diskute sira nia postura Governasaun nian. Iha momentu ne’ebá iha informasaun sira ne’ebé lekar sai hosi media local sira katak Governu VII ne’e sei kompostu ho membru Governu liu 40 ne’ebé mós inklui membru Governu balu ne’ebé durante tinan sanulu ikus ne’e mós hola parte iha Governasaun Timor-Leste nian. CGT-TL nudár koligasaun sosiedade sivíl sira ne’ebé servisu iha area transparénsia no boa governasaun nian hala’o komunikadu imprensa ida iha loron 11 Juñu 2018 hodi husu ba AMP atu “….. VIII Governu forma ho estrutura ne’ebé ki’ik maibé ideal no Servicu Vice Ministru no Sekretáriu Estadu balun bele halo merjer no presiza haforsa de’it ekipa tékniku ezekutivu sira hodi bele jere programa ho mais efetivu no efikásia.”

 

Aleinde ne’e, CGT mós husu ba Prezidente Repúblika DR. Lu Olo atu “…halo hili no fihir ho didi’ak ba kandidatu membru VIII Governu sira ne’ebé inkapasidade, problematiku, atu labele repete erru sira iha tinan 10 kotuk liu ba”.

Objetivu hosi komunikadu imprensa ida ne’e mak atu Governu foun ida ne’e bele mai ho estrutura ne’ebé ki’ik maibé iha efisiénsia no mós evita atu iha membru Governu ne’ebé mós hosi korrupsaun no mós aktu krime sira seluk molok sira asume pasta foun ba tinan lima oin mai.

 

Iha loron 22 Juñu 2018, Prezidente Repúblika halo tomada de posse ba Primeiru Ministru ba VIII Governu Konstitusional Sr. Taur Matan Ruak ho nia membru Governu sira. Maske nune’e, iha Membru Governu na’in 11 mak seidauk bele hetan tomada de posse hosi Prezidente tanba  entre sira ne’e iha diskunfiansa katak sira balu hasoru hela prosesu julgamentu no mós investigasaun hosi Ministériu Públiku nian ba kazu balu ne’ebé sira komete hela ba, no mós tuir informasaun balu sei hetan tomada de posse tan iha fulan Jullu nia laran. Iha pro-kontra ba desizaun Prezidente ida ne’e nian, no CGT sei kontinua atualiza nia pájina ida ne’e hodi bele fahe informasaun tan ba ita-boot sira.

 

Komunikadu Imprensa CGT nian kompletu

 

“IMI NIA PROMESA, AMI NIA ESPERANSA “

 

Relasiona ho formasaun VIII Governu Konstitusional, ba periodu 2018 – 2023 ne’ebé la’o daudaun hafoin liu tiha eleisaun antisipada hosi Koligasaun Aliansa Mudansa ba Progresu (AMP) kompostu husi Partidu CNRT, PLP no Partidu KHUNTO, ne’ebé hetan konfiansa maioria husi povu hodi forma VIII Governu. Nudar rede organizasaun sosiedade sivil, Core Group Transparency hakarak hato’o Parabens ba AMP, inklui partidu polítiku sira hotu ne’ebé partisipa ona iha festa demokrasia ne’e ho paz.

CGT mós akompaña prosesu kampaña eleitorál ne’e no  halo gravavasaun partidu polítiku sira nia promesa tomak ba povu. Ami espera katak Partidu vensedor ne’e sei kumpri nia promesa sira atu bele kore povu husi kiak no fo moris ho dignu.

Core Group Transparency hare katak, VIII Governu Konstitusional sei forma ho Estrutura hamutuk ema na’in 42. Maske ami konkorda katak Órgaun Ezekutivu tenke iha estrutura ne’ebé forte, hodi bele jere mákina estadu ho kualidade,  maibé, esperiénsia iha V Governu Konstitusional Periodu 2012 – 2017, ho estrutura boot (ema nain 55) la hatudu efikasia servisu.  Core Group Transparency hanoin katak, Estrutura Governu ne’ebé forte la signifika tenke habelar  no luan estrutura, maibé presiza iha kapasidade méritu husi Ministru no Sekretáriu Estadu hodi interpreta no intende Programa Governu hodi garantia nia ezekusaun bele la’o ho efetivu no efikasia.

CGT preokupa ho pezu ne’e ba Orsamentu Jerál Estado kada tinan. Desde tinan lima ikus ne’e,  Governu gasta ona Biliaun US$ 3.9 hodi selu deit makina Estadu sira, no ida ne’e seidauk inklui Orsamentu ba Pensaun Vitalisia. Tanba ne’e, atu fo hanoin atu tetu hodi bele dezeña estrutura Governu ne’e responsive. 

Ami konkorda tebes ho komprimisiu polítika husi AMP hodi reforma Lei Pensaun Vitalisia nune’e lebele fó todan ba Despeza Estado. Iha tinan 2017, Governu aloka tokon US$.4 hodi selu deit Eis Deputadu/a no Eis Titular membrus orgaun Soberania, no alen de ne’e mós despeza orsamentu iha saláriu e vensimentu nia average sempre sa’e kuaze 20%, no iha tempu ne’ebé hanesan Reseitas doméstika la hatudu kresimentu ne’ebe signifikante.

Iha nia kompromisu Polítika AMP, defini prioridade hanesan Reforma Lei Pensan Vitalisia, Aselera Lei Anti Korupsaun, Asegura Dezenvolvimentu Sosiál, Ekonomia no Infrastrutura ne’ebé orientadu hodi hadi’a moris povu nian no kria kampu servisu, rehabilita infrastrutura bázika, diversifika Ekonomia baze ba seitór Agrikultura, Turismu hodi labele dependente ba Fundu Minarai, sai pilares importante husi programa 10 AMP nian.

Ami enkoraza ba lider AMP nian hotu tenke iha konsistensia mós iha ezekusaun atu bele atini mehi povu nian, nune’e polítiku na’in sira laos hato’o programa mamuk hodi romantija povu iha mehi ás nia leten  maibe la realize.

Aleinde ne’e, ami hare Papel S.E. Presidenti da Repúblika importante tebes iha formasaun VIII Governu, iha Konstituisaun RDTL Artigu 106 sobre “Nomeasaun”, Presidenti sei hili liu husi proposta ne’ebé AMP aprezenta,. Iha Governu Anterior, lideransa barak mak problematiku, tanba iha iha indikasaun ba krime balun ne’ebe prosesa hela no Ministeriu públiku. Esperiénsia tinan kotuk liu ba hatudu ona katak, membru Governu balun inkapasidade hodi jere programa ne’ebé fiksu ona, to’o ikus nunka atinji mehi hodi sai husi dependensia ba Fundu Minarai.

Tanba seitór produtivu hanesan fonte principal ba reseita estado, nune’e Sua Exelénsia Presidenti bele fihir ho di’ak no monta ema tuir sira nia meritu service (right man on the right place), atu labele fó todan ba estadu no gastus ka despeza bele folin.

Deklarasaun riku soin, no prevene membru Governu problematiku (deskonfia kazu korrupsaun), pertenente duni hodi atinji mehi Boa Governasaun. Tanba ne’e bainhira forma ona Governu, membru Governu foun sira, tenke banati tuir Eis Presidente da Repúblika S.E. Taur Matan Ruak, ne’ebé kada tinan sempre aprezenta nia riku soin ba públiku.

Hanesan Rede NGO, ne’ebé durante ne’e hala’o mós monitorizasaun no peskiza iha prosesu dezenvolvimentu, iha esperansa ba  AMP, hodi ezekuta kompromisu polítika atu atinji mehi povu nian ba moris di’ak.  Tanba ne’e, Core Group Transparency hakarak enkoraza koligasaun AMP atu valoriza konfiansa husi povu ba atinji mehi nasaun ba libertasaun de povu, no esperiénsia tinan 10 ba kotuk sai mestri di’ak hodi la repete fila-fali. 

Bazeia ba preokupasaun iha leten, Core Group Transparency hakarak rekomenda ba Koligasaun AMP no S.E. Presidente da Repúblika hodi konsidera hanoin sira hanesan tuir mai ne’e:

  • Esperensia V Governu ho formasaun estrutura boot no luan, alen de fó pezu ba Orsamentu Estado, iha dupla servisu no halo mós burokrasia sai komplikadu nune’e, Core Group Transparency husu atu VIII Governu forma ho estrutura ne’ebé ki’ik maibé ideal no Servisu Vice Ministru no Sekretáriu Estadu balun bele halo merjer/tau hamutuk no presija haforsa de’it ekipa tékniku ezekutivu sira hodi bele jere programa ho mais efetivu no efikásia. 
  • Iha kampaña polítika, AMP esklarese ba povu no hetan duni konfiansa, nune’e Core Group Transparency husu atu identifika programa sira ne’ebé prioridade hodi halao iha fulan 3 inisiu forma Governu, atu povu iha konfiansa katak AMP sei halo duni komprimisiu ne’ebé iha. 
  • Husu ba membru VIII Governu, atu tau ás nafatin interese estadu iha prátika, no la’os deit retorika, atu labele repete fali inpase polítika tinan kotuk hodi lori ita ba Elisaun Antisipada, no husu atu atende povu iha teritoria Timor laran tomak no iha rai liur, no labele haree husi kor, rasa, suku no partido maibé atende hanesan Timor ida deit.  Husu ba Sua Exelénsia Prezidente da Repúblika RDTL, atu hili no fihir ho di di’ak ba kandidatu membru VIII Governu sira ne’ebé inkapasidade, problematiku, atu labele repete erru sira iha tinan 10 kotuk liu ba.
  • Husu ba Sua Excelensia Presidente da Repúblika RDTL atu uza nia knar VETO hodi haree no analiza bainhira Governu foun aprezenta programa no Orsamentu Jeral Estado nune’e bele atinji mehi povu ba moris di’ak no la’os membru governu deit hetan moris di’ak. Obrigado